Versjlage

Petie Parie Partie II in Heytse
Zoaterdig 13 januari 2007
Oos aller ierste joekskepelle treffe van 't seizoen en auch os ierste optreaje mit de nuuje leden; Remo Kuipers (Trombone), Koen Cuijpers (Tuba), Lian en Kristel Geelen (Saxofoon), Diana Smeets (Saxofoon), Imke Grispen (Klarinet) en Dian Joris (Klarinet). Om 20.00 oere verzameldje we biej os clublokaal café 't Stuupke en om 20.15 reeje we mit de bus richting Heytse, in Biëgdje nog ein korte stop om de Briljantjes op te hoale. Einmoal in Heytse zoot de stumming d'r sjnel in. Om ein oer of 23.00 mochte we eindelik optreaje en det ging geweldig hel! We felicitere Limburgskampioen Repke Tepke oet Pey-Echt mit de 1 e pries, Gans Om oet Höär mit de 2 e pries en Jonk Vleisj oet Deetere mit de 3 e pries. Nog allemoal erg enthousiast van os ierste optreaje hubbe we alweer zin in 't volgendje en det is zoaterdigmiddig de enige echte Haelder jeugdj bontje middig de BAEREMIDDIG!

Zate Hermeniekestreffe Mofert
16 jannewarie
Baerekepel valtj in Mofert oppernoew in de prieze!!!
De klassering waas dit jaor ein plaetske lieëger den väörig jaor, mer mèt ein derdje pries achter de Limburgse Kampioen van 2003, de Roepoepers oêt Grevenbicht en oos eige Rettich Bend väör os in de klassering, zeen wae aevegood duchtig in oos nopjes! Al väör ’t derde jaor op rie zeen we in Mofert in de prieze gevalle! En det is ouch percies ’t aantal kieëre det wae in Mofert aan ’t Zate Hermeniekestreffe höbbe mètgedaon! Daobie waas ’t netuurlik manjefiek det “de Rettich Bend” en wae zellef allebei oêt Hael in de top3 sjtonge! En zoeë gaon medalies goud en gael, altiêd mèt nao Hael! De sjfeer waas fantasties, en det waas mesjiens nog väöl belangrieker den ’t sjpele zellef! De Moferter luuj zate al lekker in sjtumming en wie rondj de aovendjinval oze eige Prins Paul II mèt adjedant Roy nog èns bènnekwame waas ’t fieëst hieëlemaol kompleet!

Häötemetäötegeträöt kepelletreffe Hael
15 jannewarie
Braobanjers, kwame, zage en ueëverwonne op Häötemetäötegeträöt in Hael!
De Häötemetäötegeträöt kemissie van “de Gangmaekers” maag opnoew trök kieke op ein grandioos gesjlaagdj evenement. Al väör ’t zevendje jaor op rie wètj men bie dit joekskepelletreffe gooj kepelle te koppele aan ein magnefieke sjfeer woeëbiej gein ènkele persoon sjtil kèn blieve sjtaon. Vastelaovessamba’s, klassieke sjlagers en lekkere welskes….nieks bleef de fanatieke vastelaovesveerders onthaoje! De zaal waas al bènne ènkele menute in ekstase, en toen kós ’t fieëst eigelik al neet mieër kepot! Degene die daobie ’t meiste in de sjmaak van de fervente jury veel woeëre de Dommelaers oêt Eindhove!Zie kwame väör ’t ieërst nao Hael toe en deje drek de belofte d’r ’t volgendj jaor weer bie te zeen! De aanmoedigingspries ging nao “Jonk Geweldj” oêt Heytse!

Zate Hermeniekestreffe Peijer Doosjvlaegels
11 december
1e of 2e Priês?!?
Aafgeloupe zaoterdigaovendj 11 december sjtong in ‘t teiken van ‘t kepelletreffe van de "Peijer Doosjvlaegels" in de keffees van Pey. Jaomer genogt haaj de Jeugdharmenie "de Vriendenkrans" oêt Hael op daezellefdje aovendj häör sjpesjale Promskonzaer georganiseerdj woeëdoor de lede van de harmonie d’r helaas neet bie koste zeen. ’t Gevolg waas det wae mèt mer 12 man present koste zeen in Pey. Väörig jaor woeëre wae dao nog de winnaar, dus we móste dit jaor waal trök nao Pey, om de wisselbaeker te ueëverhandige!
En waat sjpele we ouch nog väör elkaar; we winne opnoew ein van de felbegeerdje baekers!!! Allein waas de groeëte vraog noe oeteindelik….Zeen we noe ieërste of twieëdje gewoeëre??? Op oos baeker sjtuitj nummer ein gegraveerdj, mer omgerope waerdje wae es nummer twieë! Waat ’t ouch maag zeen. Esse mèt zoeë weinig man aevegood nog mèt ein baeker nao hoes kèns gaon, den höbse de Haelder ieër toch duchtig hoeëggehaoje! Mer ’t allerbelangriêkste waas nog waal det wae gewueën eine fantastiese aovendj ongeros höbbe gegadj! De sjfeer "zaat" (neet mèt drank) d’r al flot in en ’t waas den ouch ein avontuur om neet sjnel te vergaete!

LKZH 2005 Zjwaame
16 oktoeëber 2005
Ouch op LKZH gaon medalies goud en gael mèt nao Hael!!!
Vanaaf zaoterdig 16 oktoeëber moge wae os zeer grueëts toet ein van de bèste joekskepelle van Limburg numme! Mèt sjlechts ein miniem versjil mèt de nummer drie zeen wae net veerdje gewoeëre mèt ein volges de jury, opmerkelik hoeëg puntje-aantal. Jurylid,Tom Doesburg beväörbeildj...baeter bekèndj es de prizzentator van de Boeëtegewoeëne Boeëtezitting in de Zoepkoel in Venlo gaaf oos klub op alle frontje ein dieke 9!

Ouch de Rettich Bend oêt Hael hieët eine perfekte prestasie geleverdj. Zie waerdje twieëdje väör ’t twieëde jaor op rie! Dus twieë kepelle oêt Hael in de top 4 van Limburg! Ein absoluut unikum woeë wae grueëts op zeen wie ein paerd mèt twieë sjterte! Ein aoj Haelder sjpreuk zieët neet väör niks "Medalies goud en gael, die gaon mèt nao Hael!".
Hael maag zich dus op gaon make väör ein muzikaal hoeëgsjtaondje vastelaovendj!