Sjaele van 't Jaor

Ein van de belangriekste dinger die wae mèt de vastelaovesdaag doon is ’t oêtrope van de "Sjaele" Baerekepeller van ’t jaor!

De huidige Sjaele hieët de taak om de lede van de kepel ’t ein jaor èns ekstra in de gate te haoje. In samesjpraok mèt de aod-Sjaele waerdj den de noewe Sjaele gekaoze. De trofee??? Eine sjpesjaal door kunstenieër "Sjang de Sjaele" ontworpe trofee dae biej de desbetreffendje Sjaele van ’t Jaor op 't nachkeske mót sjtaon en eine bril dae mèt de vastelaovesdaag gedrage mót waere! Mer dink d’r aan. Eine sjaele is neet zoeë mer eine Sjaele! Doe höbs ’t waal, of doe höbs ’t neet. Daorom hieët de Jury van de Sjaele van ‘t jaor ein profielsjets gemaaktj woeë de Sjaele aan mót voldoon.

De Sjaele van 't jaor is degene dae:
• Altiêd nog mèt ein glaas beer in de henj sjteit, es de rest al mèt de insjtrumente klaor sjtaon om te gaon sjpele.
• Mieër drinktj den de ueëverige 22 lede biej-ein!
• Sjlummer meintj te zeen den de 5 besjtuurslede bie-ein
• Altied te laat is op rippetisies en optraejes
• Vaker vergètj det we weer motte optraeje den 't onthaojtj!
• Altiêd nog aan 't sjpraeke is, es de rest van de kepel alweer klaor is om door te gaon mèt rippetere!
• Biej binnekomst bie ein optraeje altiêd ieërst kiektj woeë de tap sjteit in plaats van 't podium!
• Altiêd bie 't verkeerdje keffee verzameltj en den ein half oêr zich aafvrueëgtj woeë de rest van de kepel blieftj!
• Es d'r om ein neet-Limburgs nummer gevraogdj waerdj, Geneet van 't Laeve inzètj!
• Zich mieër mèt 't rondjzjwejje van 't instrument bezighaojdj es mèt 't daadwerkelijk besjpele d'r van.
• Zoeë rondj ochtestied in de keffee sjoe waerdj omdet 't knatschdonker is, en d'r den achter kumptj det de keffee gesjloeëte is!!

Nao dit te höbbe gehueërdj en vernómme, zolle wae op 6 fibberwarie de Sjaele van 't Jaor 2011 bekèndjmake!!