"Sjokkendj nuujts veur 't Haelse Gangmaekersrieek!"
David Peters numtj aafsjeit Gangmaekers

Van ein van oze korresjpondente

Gae kèntj ‘m allicht allemaol es ein van dé enthousiastelinge in 't Haelse Vastelaovesweze. David Peters leek 'n sjtuwendje kracht mèt verfrissendje ideeje te waere bènne 't Gangmaekersriek. En toch niks is minder waor, want ozze informant leet os ein boeëtegewueën ontnuchterendj noewtje toekómme.

Nao ‘nne aovendj flink sjtappe mèt de ganse redaksie van de Roddelvot biej Wil en Vief besjloeët de kroegbaas terecht det 't om 11.00 oer toch echt waal welletjes waas gewaesjtj. Nao enige versjnaperinge te höbbe veroberdj biej de gedoodverfdje Prins Archie Thodé, dae nog sjteeds neet begreep woeërom det de PKK ‘m haaj gepasseerdj, kwoeëme wae in kontakt mèt ´nne erg leuke jong dae trombone sjpeeldje biej de Hofkepel. Dae vertèldje os det wae mer èns kontakt moste opnumme mèt David Peters, want dao ginge nogal get vraemdje verhaole ueëver róndj. De jonge entoezjasteling zooj menigeen verrasjtj höbbe oppe lètste vergadering van de Gangmaekers. David zooj wille sjtoppe mèt ziên Verenigingsaktiviteite. Zoeë wie gae van os gewèndj zeetj ginge wae drek nao de bron om dit te verifiejere.

Aangekómme op de Broekbeemde waerdje wae wie altied biezunjer hertelik óntvange door Josje Peters en wachdje wae in de komfortabele woeënkamer aaf toet David zien ópwachting zooj make. Om 14.45 oer sjtipt kwaam David bènne en de ieërlikheid gebied os om te zègke det de versjlaaggaevers toch ouch waal flink pien kriege aan häör kuutje wie ze David bènne zage kómme. Helblondj en in maotpak vertèldje hae os alles ueëver zien op aansjtaondj vertrèk bènne de Vereniging. 't Zoot David nogal hoeëg, 't gedoge van de “ieëwige diplomaat” Emile Gijsen begós ‘m behueërlik de kael oet te hange. Hae is van meining det allein echte Haelder, of hoeëgoet ‘nne Bieëgdjer of Wèssemer deil maag numme aan de Haelder Vastelaovendj. Schrijnendje berichte ueëver äövervolle zale in C.C. Don Bosco biej de Bóntje Aovendj, woeëdoor echte Haelder luuj gein plekske mieër inne zaal haaje, woeëre väör hem de druppel. 't Is potverdomme de omgekieërdje werreldj zieët David, det walgelikke gedreij en gedrentel om ederein tevreje te sjtèlle. D'r mót vanaaf noe gewueën paal en perk waere gesjtèldj aan dae ieëwige insjtroum tiedes oos Optoch, oos Bóntje Aovendje en oos drie daag. Dit jaor höbbe we gelökkig mèt zjwaantje Toon Mulder ‘nne echte hardlainer aan 't bewindj, mer mèt ziêne sjpreuk ( "Mèt deze Toon, waerdj meziek gemaaktj!" ) bekind hae toch nog aevegood gein kläör. David is es de dood väör paars mit de Vastelaovendj. Roeëd, Gael en Greun zeen de kläöre van Vastelaovendj en zoeë hueërtj ‘t! Hae is van meining det d'r mieër den genógt achterban väör zien ideologie zal zeen. Om ein statement te make, wiltj hae väörtaan gaer es David “de Wilje “ aangeduidj waere. Om dit te ongersjtrepe haet d'r ouch väör de look van ‘nne klassieke “hardliner” gekoeëze.

De Roddelvot zuutj de toekomst mit väöl onzekerheid tegemoot en hoeëptj det waat gebäördj is neet zal leide toet ein verdere polarisering van 't Haelse Vastelaovesweze.... De verbete blik van David sjpriktj echter boekdeile.