Träöte in Mofert!

De daag daonao waas ‘t tied väör ‘t Joekskepelletreffe in Mofert. Nao get opsjtartprobleme (väör bepaoldje lede) zeen wae mèt de bus aafgereisdj naar Mofert. Zoeë wie eder jaor ieërst biejein gekómme biej Kefee de Vogel, en nao de wisselbaeker te höbbe ingeleverdj zeen wae vertrokke nao de ieërste kroeg; De Rotonde. Det waas waal ein eindje loupe, mer hiejdoor kóste wae ós al lekker wermblaoze. Nao hiej ein aantal sjtukker te höbbe gesjpeeld en d’r ein aantal te höbbe gedronke zeen wae vervolges nao de volgendje kefees gewaestj: Two Spirits, ’t Tapperieke, Kefee de Vogel en Kefee Tiese. Biej Tiese kwaam Gangmaekersprins Robert I en zien adjedante Fons en Maikel bènne óm os te supportere. Daodoor höbbe wae biej Tiese mer ein extra langk optraeje gegaeve, speciaal väör ozze Hoeëgheid. Hiejnao zeen wae nao ‘t lèste kefee gegange aan de Kirk, woeënao wae weer trök nao Kefee de Vogel zeen gegange väör de finale en de priesoetreiking. ‘t Waas erg gezellig biej de Vogel en nao get meziek van versjillendje kepelle en de DJ waas ‘t den eindelik tied väör de priesoetreiking. Wae haaje de 2e pries gewónne, 1e waerdje de kepel Jonge Klaore oet de Nuujstadt. Daonao waas ’t tied om te gaon, allein kwame we d’r achter det de bus d’r nog gaaroet neet waas… Toen höbbe wae same mèt de Rettich Band nog mer ein feestje gebouwdj in de gangk biej de Vogel woeënao wae eindelik met de bus nao eige durpke Hael koste gaon. Dao ging ’t feest door toet in de late uurkes… Kortom, ’t waas weer ein super gesjlaagdj en ‘zjwaor’ Baerekepel-weekend.