1x11 jaor Baerekepel!

Om 18.00 oer begós ´t groeëte sjpektakel met de interne viering. Väörzitter Maikel haaj ein sjoeën speech väörbereid woeëbiej de belangriekste Baerekepel-momente de revue passeerdje. Daonao waas 't de bäört aan Besjermhieër Arno dae ouch ein aantal sjoeën wueërd väör ós in petto haaj. Vervolgens waerdje de jubilerendje lede gehuldigdj en krege alle lede oet henj van de jubileumkemissie ein prachtige jubileumsjpeld aangeboeëje.

Jubileumreceptie
Om 19.11 kós 't groeëte fieëst den eindelik beginne mèt de Jubileumreceptie. ’t Waas hertverwermendj om ós eige aojers es allerieërste gaste oppe receptie te moge begroete. Speciaal väör ós jubileum kreeg eder lid ein prachtige sjaal en heuptas aangeboeëje. Uiteraard in ós eige kläöre paars en gael en mèt Baerekepel logo d'r op. 't Waas sjoeën óm te zeen wieväöl minse en vereniginge de meujte haaje genómme om ós te kómme felicitere: van Pesjoeër Hooijschuur toet Wethaojer Huyskens, van Vrunj vanne Baerekepel toet Vastelaovesvereniging en van Gans Om toet Jonk Vleisj. Allemaol bedanktj väör de sjoeën wueërd en de prachtige kedoos die wae van uch móchte óntvange!

Fieëstaovendj
Naodet de klok 21.00 oer haaj gesjlage waas 't tied väör fieëst! Nemes minder es de manne van Kartoesj ueëpendje de aovendj, en ziej krege de zaal binne ein paar menute op zien kop. Waat ein sjoeëne meziek en waat ein sjtumme! Naodet ziej haaje opgetroeëje waas 't volgendje hoeëgtepuntj alweer dao: de prizzentatie van de noewe Haelder jeugd-joekskepel 3 x Nix. Dees kepel is in 't kader van 't jubileum door de Baerekepel geinitieerd en gezeen 't enthousiasme kinne wae allein mer trots zeen op 't initiatief! Waat ein sjoeën kepel en waat ein leuke groep! Twintjig jeugdige muzikante zètte Don Bosco den ouch al sjnel in leechterlaaje en wae wille häör via deze waeg nogmaals complimentere väör 't geweldige optraeje. Net zo'n geweldige optraejes woeëre d'r van de Joekskepel de Wauwelnaze oet Hael, Eine Ongerein oet Mofert, Jonk Geweldj oet Heytse en Krom dur d'n Bocht oet Leune. Bedanktj väör eur vrundjsjap en eur sjoeëne meziek! De aovendj kós neet baeter waere aafgesjloeëte den door fieëstkenon Big Benny. Op ludieke meneer kreeg hae de zaal nog eine kieër oppe kop. Mèt zien optraeje kwaam d'r den ouch ein passendj einde aan ein sjpetterendj jubileumfieëst.
Nogmaals danke wae ederein dae ein biedrage hieët gehadj in ’t sjlage van ós fieëst Mèt recht kan waere gezagdj: is dit ein kepel? Dit is ein BAERE kepel!