Thei Driesse ieërelid Baerekepel!

Zaoterdig 28 mei is Thei Driesse geridderdj toet Ieërelid vanne Baerekepel!
Ein passendje ongersjeijing mocht hae oêt henj van oze väörzitter ontvange bie keffee de Hook in Wèssem. Dao waas op det moment ein fieëst aan de gangk vanwaege zien 50e verjaordig. Det fieëst waerdje bruut ongerbroeëke door ein waalverdeendje serenade van oos kepel. Daonao waas ’t tied om ein kort wueërdje te sjpraeke, en zeker wie de betreffendje persoon hueërdje welke ieër hem te bäört veel, waas ’t fieëst kompleet.

De oetreiking van ’t Ieërelidmaatsjap op dit tiedsjtip van ’t jaor is opmerkelik te neume, aangezeen ’t Ieërelidmaatsjap normaal gesjproeëke allein in ’t vastelaovessezoen waerdj oetgereiktj. Mer vanwege de groeëte waardering en dankbaarheid aan Thei waerdje väör hem persueënlik ein oetzunjering gemaaktj. Thei is daonaeve ouch nog èns de ieërste persoon dae de titel Ieërelid te bäört is gevalle bie oos kepel. Dae ongersjeijing waerdj den ouch allein bie hoeëge oëtzunjering oetgereiktj. Thei is zonne oetzunjering!
Allerieërst waas hae in de beginjaore van oos kepel same mèt Besjermhieër Arno, oos sjteun en toeverlaot en beheerdje de finansjele zake. Hae sjtuitj op dit moment zelfs nog sjteeds same mèt oos penningmeister finansjeel garant väör os. Daonaeve is hae ein van de oprichters en sjteunpilare bie de “Vrunj vanne Baerekepel”. Mer bovenal is hae ein van de persone woeë wae op kènne vertroewe es we in nood zitte. ’t Is d’r zoeë eine woeë se den ouch noeëts tevergaefs ein beroep op duis. Bezeuk ein optraeje van de Baerekepel, en de kins d’r op raekene detse Thei tieënge ’t lief löps!

Zonne persoeën hieët den ouch diek en döbbel de titel Ieërelid verdeendj!
Thei, eine dieke perfisiat en bedanktj väör alles waatse väör os beteikens en höbs beteikendj!