Waat is de Baerekepel

Vastelaovendj is ein fieëst van klank en kläör!!! Ein zate hermenie is biej ut oetsjtraole van dees twieë kernbegrippe ónmisbaar. Daorom vinje wae ut fantasties det wae es ein sjtel knatschgekke en jeugdige muzikantje, ein van die zate hermeniejje moge zeen diej de vastelaovendj in Limburg opfläörtj en ein sjtok erfgood van oos väörvaders in sjtandj perbeertj te haoje!!!

In september 1998 zeen wae begostj es joekskepel en sins daen tied is ut flot met os gegange. Wae zeen den ouch van ein klein kepelke oêtgegruujdj toet eine echte Baerekepel!! mèt mer leefst 32 lede! Waem det zeen kóntj gae bekiêke in ’t ongerdeil "waem is waem". En ouch nog waal allemaol jeugd van Haelder grondj!!!

Wae kènne dus waal sjtèlle det wae ós ut fieëste en tampieëste eige hobbe gemaaktj. Zoeë wiej zich det gehueertj bie ein kepel dae ziê oorsjprong vindj in ein dörp van Gangmaekers! T begintj d'r zellefs langzaam op te liêke det wae in de voetsjpoeëre gaon traeje in de roemruchte joekskepelle historiej van Hael! Want historie is d'r zeker met mer leefst 4 joekskepelle op dit moment(De Wauwelnase, Hel wiej ‘ne kerremel, de Rettich Bend en wae zellef uiteraard) en diverse roemruchte kepelle oêt ut verlaeje.

Oos naam kumptj väört oêt de Haelder kinjer Bontjemiddig, De Baeremiddig. Dao is ut allemaol begosjtj. De Baer in Hael is daonaeve ut groeëte symbool van de Haelder Jeugd. Det symbool van jeugd perbere wae es kepel den ouch oet te drage want... De Jeugd hieët de Toekomst. Verder is de kreet Baere ouch eine echte Haelder kreet dae sjluitj op ut Nederlandse woeërd "goed" , mer of det ouch op os van toepassing is dao mótj gae zellef mer ut fiêne van achterhoeële...
Inmiddels höbbe wae zellefs al ein besjtuur nueëdig om de gooje orde te beware!!
Det besjtuur tracht uiteraard op sjlinkse wijze om mèt duustere achtergronje oos kepel te versjterke.(of meintj det in eder geval!!)

Dit besjtuur waerdj gevormdj door Ralf Naus, Dyonne Rutten, Yoni Rutten (sikkertaris), Anouk Driessen (penningmeister/centeteller!) en Maikel Driessen (väörzitter). Ut liêktj os den ouch waal duudelik detj gae nog lang neet van os aafzeetj door oze jonge laeftied! Is dit ein kepel???

Dit is eine BAEREkepel!!!!